‘காமி’ – திரை விமர்சனம்

‘காமி’  ( GAAMI ) என்றால் தேடல் உள்ளவன் என்று பொருள். வித்தியாசமான முயற்சிகளில் தேடல் கொண்டவரா நீங்கள்? அப்படியென்றால் இந்தப்படம் உங்களை திருப்திப்படுத்தும்.

கதை இதுதான்…

ஷங்கர் (விஸ்வக் சென்) அகோரியாக வாழ்ந்து வருகிறார். மனிதர்களை இயல்பாகத் தொடுவது என்றாலே அவருக்குப் பிரச்னைதான். உடல் முழுவதும் ஷாக் அடித்த உணர்வுக்குச் சென்றுவிடுவார் (Haphephobia). இதனைக் குணப்படுத்த இமய மலையில் 36 வருடங்களுக்கு ஒருமுறை முளைக்கும் தாவரம் ஒன்றை எடுக்கச் செல்கிறார். மற்றொரு புறம், சில பிற்போக்கான நம்பிக்கைகளால் தேவதாசியாக இருந்த துர்காவின் (அபிநயா) மகளைத் தேவதாசியாகப் பணிபுரியக் கட்டாயப்படுத்துகிறார்கள். இதற்குப் பயந்து அந்தச் சிறுமியும் தப்பி ஓடுகிறாள். மற்றொரு பக்கம், விநோதமான மருத்துவ ஆராய்ச்சிக்காகச் சிறையில் ஒரு சிறுவன் அடைக்கப்படுகிறான். அதிலிருந்து தப்பிக்க ‘Shawshank Redemption’ பாணியில் பல முயற்சிகளைக் கையில் எடுக்கிறான். இந்த மூவரும் அவர்கள் நினைத்ததை முடித்தார்களா, மூவருக்குமான தொடர்பு என்ன என்பதே இத்திரைப்படத்தின் கதை.

அகோரியாக நடித்திருக்கும் விஸ்வக் சென், இயல்பான நடிப்பால் ஈர்க்கிறார்.  சக பயணியாக சில சூழல்களால் ஷங்கருடன் இமயம் செல்லும் சாந்தினி செளத்ரி, நிறைவான நடிப்பை வழங்கியிருக்கிறார். தேவதாசிகளின் துயரத்தையும் வலியையும் பார்வையாளர்களிடம் கடத்துகிறார் அபிநயா. சிறையிலிருந்து தப்பித்துவிட வேண்டும் என்ற ஏக்கத்தைப் பார்வையாளர்களுக்கு ஏற்பட வைக்கும் நடிப்பை வழங்கியிருக்கிறார் ‘தும்பட்’ புகழ் முகமது சமாத். இந்தப் பிரதான பாத்திரங்கள் தவிர, சின்ன சின்ன கதாபாத்திர நடிகர்களும் தங்களுக்குக் கொடுக்கப்பட்ட பணியைச் சிறப்பாகச் செய்திருக்கிறார்கள். கதைக்கரு தொடர்பான பல விஷயங்களும் தெளிவாகப் புரியும்படி, சரியான மீட்டரில் திரைக்கதையில் அமைத்திருக்கிறார்கள். அட்வென்சர் த்ரில்லர் திரைப்படங்களுக்கு உரித்தான முக்கியமான விஷயங்களைத் திரைக்கதையில் சரியான அளவில் சேர்த்து த்ரில் உணர்வைக் கொடுக்க முயன்றிருக்கிறார்கள்.