’மனிதர்கள்’விமர்சனம்

ஐந்து நண்பர்கள்; ஓர் இரவு; அப்போது நிகழும் நண்பனின் இறப்பு. இதனால் நண்பர்களுக்குள் ஏற்படும் மோதல்; அதன்பின் தொடரும் திக் திக் சம்பவங்களே ‘மனிதர்கள்’.

திண்டுக்கல்லைச் சேர்ந்த கபில் வேலவன், தக்‌ஷா, குணவந்தன் தனபால், அர்ஜுன் தேவ்,  பிரேம் ஆகியோர் நள்ளிரவில் குடிக்கும்போது போதையில் சண்டை போடுகிறார்கள். எதிர்பாராதவிதமாக, பாட்டில் குத்தி ரத்த வெள்ளத்தில் கிடக்கிறார் பிரேம். இது விபத்தா, கொலையா என நண்பர்களுக்குள் நடக்கும் வாக்குவாதமும், உடலை மறைக்க அவர்கள் செய்யும் விபரீத முயற்சிகளும் காட்சிகளாக விரிகின்றன. இந்தச் சம்பவத்தையும், அதைத் தொடரும் நிகழ்வுகளையும் ராவான த்ரில்லராகத் தந்திருக்கிறார் அறிமுக இயக்குநர் இராம் இந்திரா.

நண்பர்களிடம் கட்-அண்டு-ரைட்டாக கண்டிப்பு காட்டி, முடிவுகள் எடுக்கும் கர்லி கேரக்டரில் கபில் வேலவன் சிறப்பு! பதற்றமும் நடுக்கமுமாய் ‘பாவா… பாவா…’ என தெக்கத்தி வட்டார வழக்கில் பேசிப் படமெங்கும் துன்பியல் நகைச்சுவைக்குப் பங்களிப்பு செய்திருக்கிறார் தக்‌ஷா. குணவந்தன் தனபால், சாம்பசிவம், அர்ஜுன் தேவ் ஆகியோர் கொடுத்த வேலையைச் செய்திருக்கிறார்கள்; சில இடங்களில் அதீதமாகவும் நடித்திருக்கிறார்கள்.