திரை விமர்சனம்

ஆகாயத்தில் ஒரு தாரகை (AOT) விமர்சனம்!

ஆணாதிக்கம் நிறைந்த குடும்பத்தில் பிறந்து வளர்ந்த கல்பனா (சாத்விகா வீரவள்ளி), விண்வெளி வீராங்கனையாக வேண்டும் என்ற கனவை மனதில் சுமக்கிறாள். ஆனால், குடும்பத்தின் முடிவால் கிருஷ்ணா (துல்கர் சல்மான்) என்பவரைத் திருமணம் செய்துகொள்ளும் அவளது கனவு தகர்ந்துவிடுகிறது. திருமணத்திற்குப் பிறகு கனவுகளைத் தொலைத்துவிட்டதாக நினைக்கும் கல்பனாவுக்கு, கிருஷ்ணா ஒரு எதிர்பாராத வரமாக அமைகிறார். மனைவியின் கனவுகளை முடக்க நினைக்காமல், அவற்றுக்கு உயிரூட்டத் துணை நிற்கும் கிருஷ்ணா, கல்பனையின் வாழ்க்கையில் புதிய வெளிச்சத்தை ஏற்படுத்துகிறார்.

ஒரு பெண்ணின் கனவு, அதற்குத் துணையாக நிற்கும் காதல், புரிதல், தியாகம் என உணர்வுகளை அழகாகக் கோர்த்திருக்கிறது ‘ ஆகாயத்தில் ஒரு தாரகை’. தெலுங்குத் திரைப்படங்களைத் தேர்ந்தெடுக்கும் போதெல்லாம் ஏதோ ஒரு தனித்துவமான உணர்வை ரசிகர்களிடம் விட்டுச் செல்லும் துல்கர் சல்மான், இந்த முறை அழுத்தமான உணர்வுப்பூர்வமான கதையுடன் வந்திருக்கிறார்.

கல்பனா – கிருஷ்ணா இடையேயான உறவு படத்தின் மிகப்பெரிய பலம். காதல் என்பது ஒருவருடைய கனவுகளைத் தனக்குள் அடக்கிக்கொள்வது அல்ல; மற்றொருவரின் கனவுகளுக்கு வழிவிட்டு, அவர்களின் வெற்றியில் மகிழ்வதும்தான் என்பதை இருவரது உறவின் வழியே அழகாகச் சொல்லியிருக்கிறார்கள். ஒருவரையொருவர் புரிந்துகொள்ளும் விதமும், இக்கட்டான தருணங்களில் உறுதுணையாக நிற்கும் தருணங்களும் மனதை நெகிழச் செய்கின்றன.

வசனங்கள் படத்தின் உணர்வுகளுக்கு ஆழம் சேர்க்கின்றன. சில இடங்களில் வார்த்தைகளைவிட மௌனமே அதிகம் பேசுகிறது. அந்த மௌனங்களும், கதாபாத்திரங்களின் உணர்வுகளை வெளிப்படுத்தும் விதமும் படத்தின் அழகை மேலும் கூட்டுகின்றன. ஜி.வி. பிரகாஷ் குமாரின் இசை, கதையின் உணர்வுகளோடு பயணித்து, திரையில் நிகழும் தருணங்களுக்கு இனிமையான துணையாக நிற்கிறது.

தெலுங்குத் திரைப்படங்களில் பெண் கதாபாத்திரங்களின் சித்தரிப்பு குறித்து விமர்சனங்கள் எழுந்துவரும் சூழலில், கல்பனா போன்ற ஒரு கதாபாத்திரத்தை உருவாக்கியிருப்பது பாராட்டுக்குரியது. கனவு காணும் பெண்ணாக மட்டுமல்லாமல், அதை அடையத் துடிக்கும் மன உறுதி கொண்டவளாகவும் கல்பனையை வடிவமைத்திருக்கிறார்கள். சாத்விகா வீரவள்ளியின் தேர்வு படத்திற்கு மிகப்பெரிய பலம். முதல் படத்திலேயே இயல்பான நடிப்பால் கவனம் ஈர்க்கிறார். அறிமுக நடிகை என்ற தயக்கமோ தடுமாற்றமோ இல்லாமல், கல்பனாவாகவே வாழ்ந்திருக்கிறார்.

கிருஷ்ணா கதாபாத்திரம் துல்கர் சல்மானுக்கு மிகவும் பொருத்தமானது. தனது வழக்கமான வசீகரத்தோடு, மனைவியின் கனவுகளுக்காகப் பின்னால் நின்று ஆதரிக்கும் ஒரு முதிர்ச்சியான மனிதராகத் திரையில் மிளிர்கிறார். நாயகிக்கு முக்கியத்துவம் கொடுக்கும் கதையில், தன்னுடைய நட்சத்திர அந்தஸ்தை ஓரமாக வைத்துவிட்டு, கதாபாத்திரத்தின் தேவைக்கேற்ப நடித்திருப்பது அவரது சிறப்பு. இந்த கிருஷ்ணா, ‘ராஜா’ படத்தில் வரும் வெங்கி கதாபாத்திரத்தை நினைவூட்டுகிறார்.

ஸ்ருதி ஹாசன் தனது கதாபாத்திரத்தின் மூலம் கதைக்கு வலுவூட்டுகிறார். சாத்விகாவுடனான அவரது முதல் சந்திப்புக் காட்சி குறிப்பிடத்தக்கது. பிஜிலியாக வரும் ருஹானி சர்மா கலகலப்பூட்டுகிறார். துல்கருடன் அவர் இந்தியில் பேசும் காட்சிகளும், மொழி புரியாமல் துல்கர் தவிக்கும் தருணங்களும் நகைச்சுவையைத் தூண்டுகின்றன. துல்கரின் சகோதரியாக ஸ்வசிகா சிறப்பாக நடித்திருக்கிறார். சைது ஜொன்னலகட்டாவும் தனது கதாபாத்திரத்திற்கு நியாயம் செய்திருக்கிறார்.

கதையும் உணர்வுகளும் சிறப்பாக அமைந்திருந்தாலும், தொழில்நுட்ப அம்சங்களில் சில தடுமாற்றங்கள் இருக்கின்றன. குறிப்பாக, ராக்கெட் மற்றும் விண்வெளி தொடர்பான காட்சிகள் இன்னும் பிரம்மாண்டமாகவும் விரிவாகவும் இருந்திருக்கலாம். செயற்கை நுண்ணறிவு தொழில்நுட்பத்தில் உருவாக்கப்பட்ட தொலைக்காட்சி செய்திக் காட்சிகள் சில இடங்களில் செயற்கையாகத் தெரிகின்றன. இரண்டாம் பாதியில் கதை நகரும் வேகமும் அவ்வப்போது குறைகிறது.

இருப்பினும், ஜி.வி. பிரகாஷ் குமாரின் பாடல்களும் பின்னணி இசையும் படத்திற்கு இனிமையான பலம். சுஜித் சாரங்கின் ஒளிப்பதிவு காட்சிகளை அழகாகக் கையாள்கிறது. படத்தொகுப்பும் கதையின் ஓட்டத்திற்கு உதவுகிறது. ஆனால், விண்வெளிக் காட்சிகளில் பயன்படுத்தப்பட்ட விஎஃப்எக்ஸ் (VFX) எதிர்பார்த்த அளவுக்கு இல்லை என்பது ஏமாற்றம்.

குன்னம் கங்கராஜுவின் திரைக்கதை, பல உணர்வுகளையும் நிகழ்வுகளையும் ஒன்றோடொன்று இணைத்து நேர்த்தியாகப் பயணிக்கிறது. சில சம்பவங்கள் வேகமாகக் கடந்து சென்றாலும், கதையின் அடிப்படை உணர்வு எங்கும் சிதையவில்லை. காதல், லட்சியம், மன உறுதி ஆகியவற்றை மையமாகக் கொண்ட கதையை, பவன் சாடினேனி தனது இயக்கத்தில் அழகாகக் கையாண்டிருக்கிறார். குறிப்பாக, வசனங்களின் வழியே கதையின் உணர்வுகளை வெளிப்படுத்தியிருக்கும் விதம் பாராட்டத்தக்கது.

பெண்ணின் கனவுகளுக்குத் திருமணம் தடையாக இருக்க வேண்டியதில்லை; புரிதலும் அன்பும் இருந்தால், அந்தக் கனவுகளுக்குக் காதலே சிறகாக மாறும் என்பதைச் சொல்லும் படம் ‘ஆகாசம்லோ ஒகா தாரா’. துல்கர் சல்மானின் இயல்பான நடிப்பும், சாத்விகா வீரவள்ளியின் புத்துணர்ச்சியான அறிமுகமும், மனதைத் தொடும் வசனங்களும், இனிமையான இசையும் படத்தின் பலம். விண்வெளிக் காட்சிகளின் குறைபாடுகளையும், சில இடங்களில் தொய்வடையும் திரைக்கதையையும் கடந்து, உணர்வுகளால் நம்மை ஈர்க்கும் இந்தப் படத்தைத் தாராளமாகப் பார்க்கலாம்!

கனவுகளுக்கு எல்லை இல்லை… அவற்றை நம்பும் இதயங்களுக்குத் தடைகளும் இல்லை!

Leave a Reply

Your email address will not be published. Required fields are marked *

CLOSE
CLOSE