நட்சத்திர இரவு : ரஜினியை சந்தித்த நடிகர் சங்க பொறுப்பாளர்கள்

நடிகர் சங்க கட்டிடப் பணிக்காக முன்னணி ஹீரோக்கள் பலர் சமீபகாலமாக முன்வந்து கோடிக்கணக்கில் நன்கொடை கொடுத்துள்ளனர். இந்நிலையில் இன்று காலை நடிகர் ரஜினிகாந்தை நடிகர் சங்க பொறுப்பாளர்கள் சந்தித்து நட்சத்திர கலை இரவு நடத்துவது தொடர்பாக சந்தித்துப் பேசியுள்ளனர்.

இதுகுறித்து நடிகர் சங்கம் விடுத்துள்ள அறிக்கை வருமாறு:-

“தமிழ்த் திரையுலகின் முன்னணி நடிகர் சூப்பர் ஸ்டார் ரஜினிகாந்தை தென்னிந்திய நடிகர் சங்கத்தின் பொருளாளர் தி கார்த்தி, துணைத் தலைவர்கள் பூச்சி எஸ்.முருகன், கருணாஸ் ஆகியோர் இன்று போயஸ் கார்டனில் உள்ள அவரது இல்லத்தில் நேரில் சந்தித்தனர். தென்னிந்திய நடிகர் சங்கம் சார்பில் நடத்தப்படும் நிகழ்ச்சிகளில் சங்கத்தின் மூத்த உறுப்பினர்களான ரஜினிகாந்த் அவர்களிடமும் மற்றும் கமல்ஹாசன் அவர்களிடமும் ஆலோசனை பெறுவது வழக்கம். அந்த வகையில் அடுத்து நடத்த திட்டமிடப்பட்டுள்ள நட்சத்திர கலை விழா குறித்து இன்று ஆலோசனை நடத்தினார்கள். வேகமாக நடைபெற்று வரும் நடிகர் சங்க கட்டிடப் பணிகள் குறித்து ஆர்வமாக கேட்டறிந்த ரஜினிகாந்த், விரைவில் நேரில் வந்து கட்டிடப் பணிகளைப் பார்வையிட உள்ளதாக மகிழ்ச்சியுடன் தெரிவித்தார்.”