கொலையாளி யார் என்று தலை சுற்றவைக்கும் சஸ்பென் டிராவல் ‘டென் ஹவர்ஸ்’ – விமர்சனம்

ஆத்தூரில் இன்ஸ்பெக்டராக இருக்கும் சிபிராஜ் வழக்குகளை கையால்வதில் கில்லாடி. அவரது ஸ்டேஷன் லிமிட்டில் கல்லூரி மாணவி ஒருவர் காணாமல் போனதாகப் புகார் வருகிறது. அந்த வழக்கை விசாரிக்கச் சம்பவ இடத்துக்குச் செல்லும்போது, ஆம்னி பஸ்ஸில் செல்லும் ஓர் இளம்பெண் தாக்கப்பட்டதாகப் புகார் வருகிறது. அந்த பஸ்ஸை மறித்து உள்ளே போனால் இளைஞர் ஒருவர் கொலை செய்யப்பட்டு கிடக்கிறார். இந்த சம்பவங்கள் நேர்க்கோட்டில் இணைந்து குற்றவாளி பிடிபடும்போது ‘டென் ஹவர்ஸ்’ ஓவர்.

விசாரணைக் காட்சிகளில் சிபியின் நடிப்பு கச்சிதம். படத்தின் ஒட்டுமொத்த திரைக்கதையின் சிலுவையையும் சிபி ஒருவரே சுமக்கிறார். அவரது ‘வாட்ஸன்’ ஆக காவலராக வரும் கஜராஜ், பாதி நேரங்களில் காணாமல் போனாலும், வரும் காட்சிகளில் நடிப்பில் குறையேதுமில்லை. போதையில் இருக்கும் கிளீனராக ஆடுகளம் முருகதாஸின் பர்ஃபார்மன்ஸில் சற்றே மிகை நடிப்பு எதிர்பார்க்கிறது. திலீபன், ஜீவா ரவி, ராஜ் அய்யப்பா, சரவண சுப்பையா ஆகியோர் வந்து போகிறார்கள்.

இசையமைப்பாளர் கே.எஸ்.சுந்தரமூர்த்தி நான் ஸ்டாப்பாக பின்னணி இசையை கொடுத்திருக்கிறார். சில இடங்களில் அது பொருத்தமாக இருந்தாலும், பல இடங்களில் கதையிலிருந்து விலகச் செய்கிறது. முழுக்க முழுக்க இரவில் நடக்கும் கதைக்கு, ஒளிப்பதிவாளர் ஜெய் கார்த்திக் நேர்த்தியான ஒளியமைப்பைக் கொடுத்துப் படத்தின் தரத்தை உயர்த்தியிருக்கிறார்.

பஸ்ஸுக்கு வெளியே நடக்கும் சேஸிங் காட்சிகள், உள்ளே நடக்கும் உரையாடல்கள் கச்சிதமாகப் படமாக்கப்பட்டுள்ளன. திரைக்கதையில் பிரச்னைகள் இருந்தாலும், பரபரப்பான வேகத்தில் இரண்டு மணி நேரத்திற்கும் குறைவான திரை நேரத்தில் படத்தை முடித்த படத்தொகுப்பாளர் லாரன்ஸ் கிஷோருக்குப் பாராட்டுகள்.

கொலையாளி யார் என்று தலை சுற்றவைக்கும் சஸ்பென்ஸை கச்சிதமாக மெயிண்டெயின் செய்திருக்கிறது இயக்குநர் இளையராஜா கலியபெருமாளின் எழுத்து. காணாமல் போன பெண், காவலர்கள் மீது துப்பாக்கிச் சூடு, கார் துரத்தல் எனப் படம் தொடங்கும் விதமும், நாயகனின் அறிவுத் திறனைக் காட்டும் பின்கதையும் சுவாரஸ்யமாக உள்ளன.

மர்மத்தை இயல்பாக வளரவிடாத பிளாஷ்பேக் காட்சிகள், விசாரணையின்போது கதாபாத்திரங்கள் தங்கள் பின்னணியை விளக்கும் நீண்ட உரையாடல்கள் ஆகியவை ஸ்பீட் பிரேக்கர்கள்! வில்லன்கள் ஒவ்வொரு முறையும் காரை வித்தியாசமான இடங்களில் நிறுத்தித் தப்பிக்கும் விநோதம், திடீரென பேஸ்பால் பந்தைப் பயன்படுத்தி வரும் விளையாட்டான விசித்திர சண்டைக் காட்சி, கொலை நடந்தது எப்படி என்று விடை சொல்லும் இடம் ஆகியவற்றில் நம்பகத்தன்மை மிஸ்ஸிங்!
இப்படி சில குறைகள் இருப்பினும் சஸ்பென்ஸ் டிராவலாக இருக்கும் ‘டென் ஹவர்ஸ்’ பார்க்கலாம்.